ARESTADO ang apat na indibidwal sa buy-bust operation sa Brgy. Minuyan, Bulacan City nitong Sabado ng Agosto 3, 2024.
Batay sa isinagawang report ng PDEA provincial officer na ipinarating sa tanggapan ni Director General Moro Virgilio Lazo, kinilala ang mga suspek na sina Alfred Marcos Ibañez, 36 na taong gulang; drug maintainer, Mary Rose Nabo, 28 taong gulang; Mae Gutierrez, 27 taong gulang; John Eric Estabaya, 18 taong gulang, mga kapwa residente ng Brgy. Minuyan Proper, SJDM, Bulacan.
Nasamsam ng mga operatiba ng PDEA ang tinatayang nasa 15 gramo ng shabu na nagkakahalaga ng Php 102,000.00; isang gramo ng pinatuyung dahon ng marijuana na nagkakahalaga ng Php 120.00; samu’t saring mga paraphernalia sa pagsinghot; at nabawing marked money.
Ang mga nakumpiskang illegal substance ay isinumite sa PDEA RO III Laboratory Section para sa forensic examination.
Ang operasyon ay magkatuwang na isinagawa ng PDEA Bulacan Provincial Office, PDEA RO III Special Enforcement Section at ng San Jose del Monte City Police Station.
Mahaharap ang mga naarestong suspek sa kasong paglabag sa Comprehensive Dangerous Drugs Act of 2002.
