Bulacan, Cavite, Rizal, inilagay sa Alert Level 3 sa Enero 5-15

Bulacan, Cavite, Rizal, inilagay sa Alert Level 3 sa Enero 5-15

ISASAILALIM sa Alert Level 3 ang mga probinsiya ng Bulacan, Cavite, at Rizal simula Enero 5 hanggang 15.

Ito’y bunsod sa pagtaas ng bilang ng kaso ng coronavirus disease 2019 (COVID-19) dulot ng Omicron variant.

Ayon kay Acting Presidential Spokesperson, Cabinet Secretary Karlo Nograles, napagdesisyon ito ng Inter-Agency Task Force for the Management of Emerging Infectious Diseases (IATF-EID).

“Due to a sharp increase of COVID-19 cases in the  particular localities, the Inter-Agency Task Force (IATF) approved yesterday, January 3,2022, the recommendation of its sub-Technical Working Group on Data Analytics to escalate Bulacan, Cavite, and Rizal to Alert Level 3. This shall take effect from January 5, 2022 unti January 15,2022,” pahayag ni Nograles.

Matatandaan na itinaas ng IATF sa Alert Level 3 ang Metro Manila simula Disyembre 31,2021 hanggang Enero 15,2022.

Una nang pinahayag ng Department of Health (DOH) ang mataas na posibilidad ng pagkakaroon ng local transmission ng Omicron variant ng COVID-19 matapos maitala ng bansa ang mahigit sa 4,000 bagong kaso ng naturang sakit.

Sa ilalim ng Alert Level 3, pinapayagan lamang ang 30% capacity sa indoor venue at 50% capacity naman sa outdoor venue sa mga aktibidad.

Samantala pinagbabawal naman ang face-to-face classes o in-person classes para sa basic education.

Kabilang din sa ipinagbawal ang contact sports, maliban sa bubble-type setup; funfairs/carnivals, at kid amusement industries; mga concerts, casinos, horse racing, cockfighting, cockpit operation, lottery at betting shops, at iba pang gaming establishments, pagtitipon-tipon ng mga indibidwal na hindi kasama sa bahay.

SMNI NEWS