NAGTALA ng 480 bird strikes sa mga paliparan ng Pilipinas noong 2024 ayon sa Civil Aviation Authority of the Philippines (CAAP).
Maaaring magresulta ang bird strike sa menor na pinsala, pagkabigo ng makina, pagkawala ng kontrol, o pagbagsak ng eroplano.
Ayon sa datos ng CAAP, ang Ninoy Aquino International Airport (NAIA) sa Maynila ang may pinakamaraming naitalang bird strike noong 2024 na may mahigit 180 kaso, bahagyang mas mababa kumpara sa 190 noong 2023. Sumunod ang Mactan-Cebu International Airport (MCIA) na may 92 kaso noong 2024 mula sa 39 noong 2023, at ang Clark International Airport (CRK) na may 74 na kaso noong 2024 kumpara sa 71 noong 2023.
Ang pagdami ng bird strike ay maaaring dahil sa pagdami ng mga ibon na dumadaan sa Pilipinas dahil sa migration, pag-aanak, at paghahanap ng pagkain.
Sinabi rin ng CAAP, maraming migratory birds ang nagmumula sa Siberia, China, Japan, Korea, Australia, New Zealand, at iba pang bahagi ng mundo, na dumadaan sa Pilipinas sa kanilang paglipat.
Ang peak season ng migration ay mula Setyembre hanggang Nobyembre para sa mga ibon na patungong Timog, at mula Pebrero hanggang Abril para sa mga patungong Hilaga. Mayroong humigit-kumulang 700 uri ng ibon sa Pilipinas, at mga 150 rito ay migratory. Mayroon ding 117 Important Bird Areas (IBA) sa bansa na nagsisilbing tirahan ng mga ibon, kabilang ang 115 water birds na nasa threatened status.
Ayon kay Manila International Airport Authority (MIAA) General Manager Eric Jose Ines, patuloy ang kanilang pagsisikap na mabawasan ang bilang ng mga ibon sa paligid ng NAIA.
“May mga ginagamit ng pangbugaw sa kanila, ‘yun ang sinusubukan naming gawin, ‘yung iba naman susubukan sana namin last year, susubukan sana naming lagyan ng net ‘yung ibang mga pond diyan, kasi may mga pond sa loob, iniinuman nila pero parang hindi naman effective ‘yun,” ayon kay Eric Jose Ines, General Manager, MIAA.
Pinangangambahan din ang naitalang bird strike bilang posibleng sanhi ng pagbagsak ng Jeju Air Flight 2216 noong Disyembre 29, 2024, na ikinasawi ng 179 na katao.
Follow SMNI News on Rumble