Abril 28, 2025 | Xiamen, China—Nakamit ni Filipino pole vaulter EJ Obiena ang ikapitong pwesto sa ginanap na leg ng Diamond League sa Xiamen Egret Stadium. Bagama’t nagpakita ng lakas sa kanyang ikadalawang pagsubok sa taas na 5.62 meters, hindi na niya naabot ang 5.72 meters sa kanyang ikatlong pagsubok, na nagresulta sa hindi pagpasok sa podium.
Habang si Obiena ay nagkaroon ng hamon sa Xiamen, patuloy naman ang dominasyon ng world record holder na si Armand “Mondo” Duplantis mula sa Sweden, na malayang naabot ang taas na 5.92 meters, kaya’t siya ang nangunguna sa naturang paligsahan.
“Si Mondo Duplantis ay talagang isang hiyas sa larangan ng pole vaulting,” ayon kay Obiena, na nagbigay ng respeto sa kahusayan ni Duplantis sa bawat pagtatanghal nito.
Samantala, Emmanouil Karalis ng Greece at Menno Vloon ng Netherlands ay parehong nagtala ng 5.82 meters, ngunit si Karalis ang nakakuha ng ikalawang pwesto dahil sa countback.
Bagama’t hindi pumasok sa podium si Obiena sa leg ng Xiamen, ang pagtatapos sa ikapitong puwesto ay hindi hadlang upang mapanatili ang kanyang status bilang isa sa mga top pole vaulter ng mundo. Kamakailan lamang, siya ay nagwagi ng kampeonato sa Taiwan International Pole Vault Championship, isang patunay ng kanyang patuloy na dedikasyon at paghahanda para sa mas malalaking kumpetisyon sa mga susunod na buwan.
“Hindi pa tapos ang laban. Kailangan ko pa ng mas maraming ensayo para sa susunod na leg ng Diamond League,” ani Obiena matapos ang kanyang pagtatanghal sa Xiamen.
Ang susunod na leg ng Diamond League ay isang mahalagang pagkakataon para kay Obiena at sa iba pang mga elite pole vaulters. Dito, magpapatuloy ang pagtunggali para sa titulo at ang mga pagkakataon na magbigay ng magandang representasyon para sa kanilang mga bansa.
Follow SMNI News on Rumble
