OPISYAL nang itinalaga bilang susunod na PNP Regional Director ng North Central Luzon si Eastern Police District (EPD) Director PBGen Matthew Baccay.
Epektibo kahapon Nobyembre 1, itinalaga na bilang bagong Regional Director ng Police Regional Office 3 si EPD Director PBGen. Matthew Baccay.
Itoy sa ilalim ng General Orders Number 227 ng National Police Commission (NPC).
Papalitan nito ang dating PRO 3 Regional Director na si PBGen. Valeriano de Leon na magsisilbi namang acting director ng Civil Society Group ng PNP sa Camp Crame.
Papalit naman bilang bagong EPD Director si PBGen. Orlando Obispo Yebra.
Personal namang nagpaabot ng pagbati si NCRPO Chief PMGen. Vicente Danao kay Baccay dahil sa kontribusyon nito sa Eastern Police District.
Sa loob ng panunungkulan ni General Baccay sa EPD, kinilala ang distrito bilang Best Police District sa National Capital Region (NCR).
BASAHIN: Eastern Police District, tinanghal bilang Best Police District ng NCRPO ngayong taon
Bagamat may kaba aniya, nagpasalamat din si General Baccay sa papuri sa kanya ng NCRPO at ng PNP, mga miyembro ng media at mga kasamahan nito sa trabaho.
Ngayong araw, isasagawa ang official turn over ceremony sa EPD headquarters sa Pasig City.
BASAHIN: Integridad at kalinisan, sentro sa ika-47 anibersaryo ng Eastern Police District
