PINANGUNAHAN ng Bureau of Corrections (BuCor) at Bureau of Jail Management and Penology (BJMP) ang apat na araw na ASEAN Regional Correctional Conference (ARCC 2025) sa Palawan nito lang Pebrero 13-16.
Ang nasabing pagpupulong ay nagpapalakas ng kooperasyon sa pagitan ng mga bansang kasapi ng ASEAN.
Sa temang “Weaving the ASEAN Regional Corrections Identity: Co-creating a Shared Vision of Transformation,” tinalakay ng mga correctional leader mula sa Thailand, Indonesia, Singapore, Brunei Darussalam, Cambodia, Vietnam, Laos, Malaysia, Timor-Leste, at Pilipinas, kasama ang mga international organization at mga eksperto, ang mga pangunahing hamon sa larangan.
Kabilang dito ang sobrang pagsisikip sa mga bilangguan, rehabilitasyon, reintegration ng mga dating bilanggo, at seguridad.
Pinagtibay rin ang pakikipagtulungan sa pamamagitan ng mga programa sa pagsasanay, pagpapalitan ng kaalaman, at partnership sa pagitan ng mga bansang miyembro ng ASEAN.
Nagbigay rin ang ARCC ng isang plataporma para sa pakikipag-ugnayan sa mga pandaigdigang stakeholder na nakilahok sa mga talakayan tungkol sa mga estratehiya sa reporma sa bilangguan.
“We want our PDL (Persons Deprived of Liberty) to gain back the respect of our society, and then we want them to be not only here with us for safety and reformation but we want them also to be reintegrated back into society,” pahayag ni Gen. Gregorio Catapang, Jr., Director General, Bureau of Corrections.
Ang unang ARCC, na ginanap sa Langkawi, Malaysia noong Enero 2024, ay naglatag ng pundasyon para sa isang pinag-isang diskarte ng ASEAN sa reporma ng correctional.
Inaasahan na ang mga resulta ng conference ay magkakaroon ng malaking epekto sa pagpapabuti ng buhay ng mga bilanggo at sa pagtataguyod ng mas ligtas na komunidad.
