MULI na namang nagsagawa ng inspeksiyon ang Department of Agriculture (DA) sa isang palengke sa lungsod ng Pasay para alamin kung nasusunod pa rin ba ng mga rice retailer ang ipinatutupad na Maximum Suggested Retail Price (MSRP) sa imported na bigas.
Karamihan naman sa mga ito ay sumusunod sa P58 per kilo. Ang problema lang ay ang mislabeling—kung saan wala nang nilalagay na brand sa bigas.
“‘Yung dating may brand ay wala ng brand, ang inilagay naman ay ‘fancy’, hindi naman siya fancy tapos mataas ang presyo,” saad ni Sec. Francisco Tiu Laurel Jr., Department of Agriculture (DA).
Sa ngayon, wala pang inilalabas na panuntunan ang DA para maging basehan ng mga rice retailer sa pagbebenta nila.
Isang stall sa nasabing palengke ang nagbenta rin ng fancy rice sa halagang P100 kada kilo. Ang iba naman ay nasa P60, pero nang suriin ay hindi pala premium ang kalidad nito kundi nasa lebel lamang ng well-milled.
Sumunod namang tinungo ng kalihim, kasama ang iba pang opisyal mula sa Department of Trade and Industry (DTI) at lokal na pamahalaan ng Pasay, ang mga tindahan na nagbebenta ng gulay.
Nasa tatlo hanggang apat na stalls ang nakitaan ng DA ng mga smuggled agricultural product. Halimbawa na rito ang tiger chili na ‘di hamak na mas malaki kumpara sa mga ordinaryong siling pang-sigang.
Bukod sa tiger chili, nakita rin ang iba pang smuggled agri-products na posibleng galing sa China dahil sa Chinese characters nito sa packaging. Kabilang na riyan ang shemejie mushroom, king oyster, wawa chai o Chinese cabbage, lotus roots, bamboo shoot, achoy o Chinese lettuce, at garlic stick na karaniwang ginagamit daw na sangkap sa mga shabu-shabu o hotpot.
“May chili pang hindi ko pa nakita sa buong buhay ko, ngayon ko lang nakita. Wala akong maalala na nag-issue ng BPI ng ganon. So, that leads me to conclude na those are smuggled goods.”
“Wala silang health certificate, that is actually dangerous. Hindi natin alam kung mataas sa heavy metal o ‘di kaya hindi natin alam kung reject ‘yan o may pesticide content, ‘yung fertilizer na ginamit, tama ba?” wika ni Sec. Francisco Tiu Laurel Jr., Department of Agriculture (DA).
Pero paliwanag naman ng ilang nagtitinda, wala anila silang kaalam-alam na smuggled pala ang mga naturang gulay.
“Doon lang namin kinuha sa Divisoria, tapos ibinebenta lang namin dito,” ayon kay Roy Antonino, Tindero ng Gulay.
Ang tanong: Alam kaya ng market master o namumuno sa nasabing palengke na may mga smuggled na gulay na ibinebenta?
“Nalaman ko lang po kay DA po talaga.”
“Pero, kung ano po ‘yung mga sanction na puwede naming ibigay sa kanila, isa-sanction po namin,” pahayag ni Ted Velasco, Market Master, Cartimar Market, Pasay City.
DA, kinukonsidera ang paglalagay ng Maximum SRP sa karneng baboy dahil sa patuloy na pagtaas ng presyo; Ilang tindera ng baboy, pumalag
Samantala, nasita rin ng DA ang napakamahal na bentahan ng karneng baboy sa kapareho ring palengke.
Sabi ng kalihim, nasa higit P200 lang naman ang farm gate price, ngunit bakit umaabot na sa P450 hanggang P480 ang kada kilo nito sa pamilihan?
“May P150 na nawawala sa gitna. Sobra-sobra ba ang margins ng bawat layer na ‘yan? Ang P150 na nawawala is quite big, so theoretically, kung P420 dito tapos P480 doon, it is profiteering,” ayon kay Sec. Francisco Tiu Laurel Jr., Department of Agriculture (DA).
Dahil diyan, hindi inaalis ng ahensiya ang posibilidad na magpatupad rin ng MSRP sa karneng baboy kung patuloy pa rin sa pagtaas ng presyo nito.
Ngunit, pinalagan ‘yan ng ilang tindero.
“Dapat hindi sa amin, dapat hindi sa retailer. Dapat magsimula doon sa pinanggagalingan ng baboy, para makapagbaba rin kami kasi nagre-retail lang kami, pareho lang tubo namin, kahit mataas o mababa, depende lang sa puhunan, tubo namin,” wika ni Phil Joseph Mendoza, Pork Retailer.
Follow SMNI News on Rumble
