NAISUMITE na sa Malacañang ang listahan ng mga posibleng papalit kay Metro Rail Transit-3 (MRT-3) General Manager Oscar Bongon.
Ayon kay Presidential Communications Office (PCO) Undersecretary at Palace Press Officer Claire Castro, nasa Presidential Management Staff (PMS) na ang listahan at hinihintay na lamang ang pagpili ng susunod na GM ng MRT-3.
Wala namang impormasyon si Castro kung ilan ang nasa shortlist.
Matatandaang sinibak ni Transportation Secretary Vince Dizon si Bongon matapos ang aberya sa escalator sa Taft Avenue Station.
