ENERO 20 nang magpalabas ang Korte Suprema ng Temporary Restraining Order (TRO) sa desisyon ng Commission on Elections (COMELEC) na i-disqualify si former Mayor Jonas Cortes bilang kandidato sa pagka-Mayor sa Mandaue City.
Matapos nito, nagpaabot ng pasasalamat ang alkalde sa kaniyang mga tagasuporta kasabay ang pangako na itutuloy ng Team Mandaue ang kanilang mga programa.
“I would like to thank my supporters for their continued trust and confidence and to our lawyers, thank you so much for a job well done. Isa lang ang mensahe ko ngayon. That Team Mandaue will continue to prioritize programs and initiatives that will uplift our people and improve our city. So, thank you and God Bless us all,” pahayag ni Jonas Cortes, Former Mayor, Mandaue City, Cebu.
Matatandaang, noong Enero 2, dumulog si Cortes sa Korte Suprema kasama ang kaniyang legal counsel na si Atty. Joshua Monsanto matapos magpalabas ng desisyon ang Commission on Elections (COMELEC) sa pagkansela ng kaniyang Certificate of Candidacy (COC) dahil sa alegasyong material misrepresentation sa kaniyang COC.
Sa tagumpay ngayon na nakamit ni Cortes, aasahan aniya ang patuloy na pagsusulong ng kaniyang mga adhikain.
“Napakasaya ko… answered prayers, sa sinabi ni Atty. Regal na marami ang nakisimpatiya sa samahan ng Team Mandaue. Tulad ng dati, ipinaglalaban natin ang mabuting pamamahala at mapayapa at tapat na halalan para sa 2025,” dagdag ni Cortes.
Nanindigan naman ang legal counsel ng dating alkalde sa Legal Arguments na isinumite nito sa Korte Suprema.
“There is no misrepresentation in the part of Mayor Jonas Cortes because it is not final and executory and we also raise some constitutional issues but other than that we cannot dealt on the very merits because we will violate the sub judice rule but that is the general line of the arguments we have raised before the Supreme Court,” saad ni Atty. Joshua Monsanto, Legal Counsel ni Ex-Mayor Jonas Cortes.
Personal na hinatid ng court sheriff ang dokumento sa desisyon ng Korte Suprema, kung saan tinanggap at sabay na pinirmahan ito nina Mayor Jonas Cortes at Atty. Joshua Monsanto.
Dahil dito, ay agad namang nagtipon-tipon ang libu-libong mga supporters ni Cortes upang samahan ito sa pagsasagawa ng isang prayer rally bilang pasasalamat at nagkaroon ng katuparan ang kanilang ipinagdasal.
Naniniwala naman si Atty. Regal Oliva na dating city treasurer at ngayo’y tumatakbong kongresista sa ilalim ng Team Mandaue, na mayroong “abuse of power” sa ginagawa kay Cortes.
“Once we abuse power, people will tend to turn your backs on you. And what they have done against Mayor Jonas Cortes is obviously abuse of power and abuse of their connection,” wika ni Atty. Regal Oliva, Congressional Aspirant, Lone District of Mandaue.
Hiling ni Atty. Oliva na magkaroon ng eleksiyon na magsusulong ng pagkakaisa sa mga Mandauehanon.
“Let us just have an election that will promote unity among the people of Mandaue and a progressive more beautiful Mandaue City. Let’s not make this a city that is very much divided dahil marami pa tayong gagawin para sa mga mamamayan ng ating siyudad,” saad ni Oliva.
Dahil sa TRO mula sa Korte Suprema, ay kampanti ang mga supporters ni dating Mayor Jonas Cortes na magkakaroon na ng patas na laban sa darating na eleksiyon.
Tulad ng kanilang hinaing na “Eleksiyon at hindi Diskwalipikasyon.”