NAGSILBING long time security at bodyguard ni Negros Oriental 3rd District Representative Arnolfo “Arnie” Teves Jr. ang naaresto na si Marvin “Halaman” Miranda.
Ito ang inihayag ni Interior Secretary Benjamin “Benhur” Abalos, Jr. sa joint press conference ng Special Task Force Degamo sa Camp Crame, Quezon City.
Ayon kay Abalos, may malakas na ugnayan si Miranda kay Teves.
Malaki aniya ang papel na ginampanan ni Miranda sa pagpatay kay Negros Oriental Governor Roel Degamo at 8 iba pa.
Nabatid na si Miranda na itinuturing na mastermind ang nag-recruit ng mga tauhan at nagbigay ng logistical support para maisakatuparan ang krimen.
Sinasabing si Miranda ay sumusunod sa tinatawag nitong “boss idol”, “big boss” o “kalbo” na kalaunan ay pinangalanan ni Justice Secretary Jesus Crispin “Boying” Remulla na si Cong. Teves.
