NFA, bukas sa imbestigasyon ng DA hinggil sa hindi tamang pagbebenta ng bigas

NFA, bukas sa imbestigasyon ng DA hinggil sa hindi tamang pagbebenta ng bigas

BUKAS ngayon ang National Food Authority (NFA) sa gagawing imbestigasyon ng Department of Agriculture (DA).

Ito ay kaugnay sa ulat na libu-libong tonelada ng bigas umano ang hindi tamang ibinenta ng NFA sa ilang negosyante sa presyong dehado ang gobyerno.

Ang pahayag na ito ay nanggaling mismo kay DA Secretary Francisco Tiu Laurel Jr.

Sa inilabas na pahayag ni Laurel, isiniwalat nito na ipinagbibili umano sa P25/kilo ang milled rice na walang kaukulang bidding matapos bilhin ang butil ng palay sa mga magsasaka sa halagang P23/kilo.

“We are custodians of government funds—monies to be spent for the benefit of Filipinos, especially farmers and fisherfolk,” ayon kay Sec. Francisco Tiu Laurel Jr., Department of Agriculture (DA).

Iginiit ng kalihim na hindi binabalewala ng DA ang sumbong laban sa mga opisyal ng NFA.

“We do not brush aside reports of impropriety against officials of the Department of Agriculture, regardless of the source. We also welcome any government agency who may wish to conduct their own probe to ferret out the truth,” ayon pa kay Laurel.

Sa ipinadalang pahayag, sinabi ni NFA Administrator Roderico Bioco na handa ang ahensiya na sagutin ang isyung ito.

“This should set the record straight, improve the safeguards and press the need to expedite the transformation program of NFA,” ayon kay Roderico Bioco, Administrator, National Food Authority (NFA).

Iginiit din niya na may mandato ang NFA na ibenta ang mga palumang stocks ng bigas na 10% na mas mababa kaysa sa mandatong presyo na hanggang P25/kilo habang P6.50/kilo sa mga damaged stocks.

“Meantime, NFA management has recommended to the NFA Council to increase the mandated maximum selling price of NFA rice,” dagdag ni Bioco.

Pagtitiyak ng NFA, nakasentro ang ahensiya sa programa partikular na sa food infrastructure modernization.

Layunin nitong mapabuti, mapatagal ang kalidad ng bigas at maiwasan ang distress selling.

 

Follow SMNI NEWS in Twitter

Follow SMNI News on Rumble