TARGET ng Department of Public Works and Highways (DPWH) na matapos ang pagsasaayos ng mga paaralan na napinsala ng mga bagyo at iba pang kalamidad bago ang pagbubukas ng klase sa Agosto 22, 2022.
Sa isang panayam, sinabi ni DPWH Secretary Manuel Bonoan na inatasan siya ni Pangulong Ferdinand ‘Bongbong’ Marcos Jr. na bilisan ang pagpatatayo ng mga school building sa isinagawang Cabinet meeting.
Ani Bonoan, target nilang magtayo ng modular type school building para mapabilis ang pagtatayo ng mga gusali sa typhoon prone areas sa susunod na taon.
Ang modular-type building aniya ay mga prefabricated na gusali na kailangan lamang i-assemble gamit ang steel type frame materials.
