LIBRE na sa Port fees ang mga barko ng Philippine Navy at imbitadong Foreign Navies na dadaong sa Subic.
Ito ang napagkasunduan nina AFP Northern Luzon Command (NOLCOM) Commander Lieutenant General Fernyl Buca at Subic Bay Metropolitan Authority (SBMA) Chairman at Administrator, Jonathan Tan.
Ayon kay AFP NOLCOM Public Affairs Office Chief Major Anthony Pueblas, matagal nang ipinatutupad ang nasabing protocol sa mga barko ng Philippine Navy, pero pansamantalang natigil dahil sa COVID-19 pandemic.
Inaayos na aniya nila ang koordinasyon sa SBMA para sa pagpasok at paglabas ng mga barko ng Philippine Navy.
Kadalasan na sa Subic din dumadaong ang mga barko ng Estados Unidos para sa bilateral exercises sa Armed Forces of the Philippines (AFP).
