NAG-deploy ang Philippine Coast Guard (PCG) ng kanilang search and rescue (SAR) team na may air at floating assets para makilahok sa paghahanap sa nawawalang Taiwanese-flagged fishing vessel, Sheng Feng No. 128.
Ayon sa PCG, huling nakita ang fishing vessel na may sakay na 1 Taiwanese at 5 Indonesian na mangingisda sa 414 Nautical Miles Northwest ng Palau noong February 17, 2023.
Agad naman inatasan ng PCG Command Center ang Coast Guard Districts sa Eastern Visayas, Bicol, Southeastern Mindanao, Northeastern Mindanao, at Northeastern Luzon na maglunsad ng SAR operations.
Ito ay isinagawa matapos makatanggap ng request for assistance mula kay Taiwan Coast Guard Attaché, Commander Arthur Yang.
Kaninang 7:30 am, ipinadala ng Coast Guard Aviation Force ang Cessna Caravan 2081 para magsagawa ng aerial surveillance sa vicinity waters ng eastern Visayas at Bicol Regions dahil sa posibilidad na napadpad ang nawawalang Taiwanese fishing vessel sa eastern seaboard ng bansa.
