DAHIL sa patuloy na pag-aalinlangan ng mga nagbalik-loob na nag-apply sa amnesty program ng pamahalaan, nanawagan ng imbestigasyon sina Senador Robin Padilla at Juan Miguel F. Zubiri sa estado ng amnesty proclamations ni Pangulong Ferdinand “Bongbong” R. Marcos Jr.
Sa Senate Resolution 1258 na ihinain ni Padilla at Zubiri nitong Miyerkules, inaatasan ang naaangkop na komite ng Senado na hawakan ang imbestigasyon na “in aid of legislation.”
“Individuals awaiting the approval of their applications continue to face uncertainty as they transition to mainstream society, having to apply for provisional safe conduct passes and living with constant fear of harassment, intimidation and threat of arrest,” ayon sa dalawang senador sa kanilang resolusyon.
“With tens of thousands of applications expected to go through the National Amnesty Commission, it is imperative to look into the possible causes of delay in the process, with the end in view of providing for possible solutions to aid in expediting the amnesty application process, in adherence to the Annex on Normalization under the Comprehensive Agreement on the Bangsamoro,” dagdag nila.
Ayon sa resolusyon, bagama’t nilagda ni Pangulong Marcos ang Proclamation 403, 404, 405 at 406 noong ika-22 ng Nobyembre 2023 na nagbibigay ng amnestiya sa myembro ng apat na groupong rebelde, napag-alaman sa consultative meeting ng Senate Committee on Cultural Communities and Muslim Affairs ni Padilla na hanggang ngayon ay wala pang naaprubahang amnesty application galing sa Moro Islamic Liberation Front (MILF).
Sakop ng apat na proklamasyon ang myembro ng Rebolusyonaryong Partido ng Manggagawa ng Pilipinas-Revolutionary Proletariat Army-Alex Boncayao Brigade (RPMP-RPA-ABB); Communist Party of the Philippines-New People’s Army-National Democratic Front (CPP-NPA-NDF), MILF, at Moro National Liberation Front (MNLF).
Nitong Martes, nanawagan si Padilla sa kinauukulan na tugunan ang mga isyu sa Comprehensive Agreement on Bangsamoro (CAB) sa pagitan ng pamahalaan at MILF noong Marso 2014.
Sa consultative meeting kasama ang opisyal ng Bangsamoro Autonomous Region in Muslim Mindanao (BARMM), napag-alaman na hindi pa natutupad ang pangakong benepisyo sa dating MNLF at MILF na nag-apply ng amnestiya.
