SISILIPIN ng Philippine National Police (PNP) ang umano’y pamemeke ng ilang pulis ng kanilang accomplishment upang magbigay ng promosyon sa puwesto.
Ito ay kasunod ng pagsang-ayon ni Surigao del Norte 2nd district Representative Robert Ace Barbers sa pahayag ng National Police Commission (NAPOLCOM) na depektibo ang sistema ng promosyon at performance rating ng Anti-Drug Police Operatives.
Ayon kay PNP chief Police General Benjamin Acorda, Jr. na regular ang ginagawa nilang pagre-review sa mga pulis na mabibigyan ng promosyon.
Nais aniya nilang matiyak na mga kwalipikadong tauhan at malinis ang integridad ang maiuupo sa puwesto.
Sa ngayon, nakikipag-ugnayan na ang PNP sa NAPOLCOM upang mabigyan ng solusyon ang nasabing usapin.
