MALAPIT na ngang mag-break sa kaniyang career si Cha Eun-woo dahil gagampanin muna niya ang kaniyang tungkulin. Mag-e-enlist na kasi siya sa mandatory military service ngayong Hulyo 28.
Sa statement na inilabas ng kaniyang agency, pinasalamatan nila ang fans ni Eun-woo sa kanilang suporta sa singer-actor pati na sa buong grupo ng ASTRO.
Sinabi rin ng agency na magiging parte ang actor ng Army Military band bilang parte ng kaniyang military service. Nag-apply aniya si Eun-woo para makasama sa military band at nakatanggap din ng acceptance notice mula sa Military Manpower Administration. Bago nito ay dadaan muna ang aktor sa basic military training bago makapag-report sa military band.
Bagama’t gusto ng fans na ma-meet si Eun-woo sa huling pagkakataon, hindi naman ilalabas sa publiko ang oras at lokasyon ng araw ng enlistment ni Eun-woo para maiwasan umano ang congestion at mga aksidente.
Umaasa ang kaniyang agency sa suporta at encouragement ng fans para sa aktor kasabay ng kanyang military duty.
