PAPALITAN na ng eArrival Card ang One Health Pass (OHP) entry requirement para sa mga papasok sa Pilipinas.
Ayon sa Department of Tourism (DOT) na layon ng eArrival Card na gawing mas maginhawa at madali ang pagpasok ng mga Pilipino at foreign travelers sa bansa.
Bago ang paglulunsad ng eArrival Card, ang mga biyahero ay kinakailangang magparehistro para sa OHP ilang araw bago ang kanilang biyahe at gawin ang electronic Health Declaration Checklist.
Kung ikukumpara sa nakaraang sistema ng OHP, inaalis na sa eArrival Card ang mga hindi kinakailangang field ng impormasyon, na nagbibigay-daan sa mas madali at mas mabilis na pagkumpleto ng proseso ng pagpaparehistro ng manlalakbay.
Sa pagbibigay ng kanilang mga detalye sa paglalakbay, personal na impormasyon, deklarasyon ng kalusugan, at mga detalye ng pagbabakuna sa website ng eArrival Card: www.onehealthpass.com.ph, bibigyan ang mga manlalakbay ng QR code.
Ang mga manlalakbay ay dapat na kumuha ng screenshot ng QR code sa kanyang mobile o computer device at ipakita ito sa mga opisyal ng BOQ sa kanilang destinasyong airport sa Pilipinas.
Dagdag pa, hindi na kailangan ng mga manlalakbay na mag-download at mag-install ng mobile app para magparehistro, dahil ang eArrival Card ay isang browser-based na system.
Kung sakaling hindi makumpleto ng isang manlalakbay ang kanilang eArrival Card, ang BOQ ay may mga tauhan na nakatalaga sa paliparan upang tumulong sa pagpaparehistro ng mga manlalakbay.
