KASUNOD ng isinagawang operasyon ng Criminal Investigation and Detection Group (CIDG) sa Barangay Mayamot, Antipolo City, Rizal noong Hunyo 3, 2025, nasamsam ang PHP195,328 na halaga ng ilegal na cooking oil.
Ayon sa CIDG, ang mga produktong nakumpiska ay hindi rehistrado sa Food and Drug Administration at walang License to Operate. Ang operasyon ay pinangunahan ng CIDG Rizal Provincial Field Unit at Regional Mobile Force Battalion Rizal.
Ipinagmalaki ni PBGEN Rolindo M. Suguilon, Officer-In-Charge ng CIDG, ang matagumpay na operasyon at hinikayat ang publiko na agad iulat ang anumang kahina-hinalang aktibidad sa kanilang lugar. Aniya, patuloy ang CIDG sa pagsusumikap na ipatupad ang batas at pangalagaan ang kalusugan ng sambayanan.
Mahalaga ang pagkakakumpiska ng mga produktong ito upang maiwasan ang panganib sa kalusugan ng mga mamimili. Dahil hindi ito dumaan sa mga proseso ng FDA, hindi matitiyak ang kalidad at kaligtasan ng mga ito.
Tuloy-tuloy ang koordinasyon ng CIDG sa iba pang ahensya ng pamahalaan para labanan ang ilegal na gawain at tiyaking protektado ang interes ng publiko.
