Abu Dhabi, UAE – Nilagdaan na ng Pilipinas at United Arab Emirates (UAE) ang kanilang kauna-unahang bilateral security agreement, na layuning palakasin ang ugnayan sa pagsugpo ng transnational crimes gaya ng human trafficking, terrorism, at cybercrimes.
Sa pahayag ng Department of the Interior and Local Government (DILG), binigyang-diin na ang kasunduan ay sumasalamin sa magkatuwang na layunin ng dalawang bansa na itaguyod ang kapayapaan, kaayusan, at katatagan, batay sa mga prinsipyo ng soberanya at pandaigdigang batas.
“Ang kasunduang ito ay hakbang pasulong para sa mas matibay na pagkakaisa laban sa mga banta sa seguridad ng ating mga bansa,” ani ng opisyal ng DILG.
Bukod sa aspeto ng seguridad, tinalakay rin ng dalawang bansa ang posibleng pagtutulungan sa larangan ng digital technologies, urban governance, at iba pang sektor na magpapalawak sa bilateral engagement.
Ayon sa mga opisyal, ang kasunduan ay hindi lamang teknikal o legal na dokumento kundi pundasyon ng mas malalim na diplomatikong relasyon sa pagitan ng Pilipinas at UAE.
