MAGSASANIB-pwersa ang Armed Forces of the Philippines (AFP) at National Disaster Risk Reduction and Management Council (NDRRMC) para sa mabilis na pagtugon sa mga sakuna ngayong tag-ulan.
Ayon kay AFP Spokesperson Colonel Francel Margareth Padilla, magiging aktibo ang mga unified command at task forces sa pakikipag-ugnayan sa NDRRMC at iba pang ahensiya ng pamahalaan upang tugunan ang anumang mga emergency.
Naglagay na rin ang AFP ng mga asset at trained personnel sa mga high-risk area para sa agarang pag-deploy kung kinakailangan.
Kasabay ng pagpasok ng tag-ulan at habagat na ini-anunsiyo ng Philippine Atmospheric, Geophysical and Astronomical Services Administration (PAGASA) noong Hunyo 2 ay patuloy ang pagsasanay ng AFP para matiyak ang kahandaan sa oras ng pangangailangan.
