MAGTATAAS ng alerto ang Philippine National Police (PNP) bilang paghahanda sa Kapaskuhan.
Sinabi ni PNP Public Information Office chief Police Colonel Jean Fajardo na simula Disyembre 15 ay ilalagay sa full alert status ang buong hanay ng Pambansang Pulisya.
Ayon kay Fajardo, humigit-kumulang 40,000 pulis ang ipakakalat sa buong bansa.
Bukod dito, makakatuwang ng PNP ang mga tauhan ng Armed Forces of the Philippines (AFP), Philippine Coast Guard (PCG), Metropolitan Manila Development Authority (MMDA), at local government units (LGUs).
Ngayong araw, mag-iikot si PNP chief Police General Benjamin Acorda, Jr. sa ilang vital installations sa Metro Manila para tiyakin ang seguridad ng publiko.
Titingnan ni Acorda ang seguridad sa Araneta Bus Terminal sa Cubao, Quezon City at Minor Basilica of the Black Nazarene sa Quiapo, Manila.
