INILUNSAD ng Department of Education (DepEd) ang Matatag Curriculum o ang bagong K to 10 curriculum sa pangunguna ni Vice President at Education Secretary Sara Duterte, Huwebes ng hapon, Agosto 10.
Dalawang taon ang itinagal para makumpleto ang Matatag Curriculum ayon sa DepEd.
Sa ilalim ng bagong curriculum, binawasan ang bilang ng mga learning competencies o mga bagay na dapat matutunan ng mga bata kumpara sa kasalukuyang curriculum.
Mula sa higit 11,000 lessons, nasa higit 3,600 lessons na lang ang nilalaman ng K to 10 curriculum na nakatuon sa literacy at numeric skills ng mga estudyante.
“70% of the competencies in the current curriculum have been taken out of the new curriculum or Matatag Curriculum. Simply because there are competencies that repeat. Number two, that there are only competencies that are only nice to know but not a must to know,” ayon kay Director Jocelyn Andaya, Bureau of Curriculum and Development.
Lima lang ang subject sa Grade 1 kabilang ang Reading at Literacy, Language, Mathematics, Makabansa, at Good Manners and Right Conduct (GMRC) habang sa Grade 2 naman ay Filipino, English, Math, Makabansa, at GMRC.
Tinanggal na ang subject na Mother Tongue.
Sa Grade 3, madadagdagan lang ito ng subject na Science.
Habang sa Grade 4 hanggang 10 ay may walong subjects.
Peace Education, isinama na sa bagong K to 10 curriculum
Laman din ng K to 10 curriculum ang Peace Education na ayon kay VP Sara ay malapit sa kaniyang puso.
“This next feature holds a very special place in my heart. The new K to 10 curriculums will integrate peace competencies—highlighting the promotion of non-violent actions and the development of conflict-resolution skills in learners. For after all, there is security if there is peace,” ayon kay VP Sara Duterte, Secretary, DepEd.
Kabilang sa mga matutunan ng mga estudyante sa ilalim ng Peace Education ay ang self-awareness, social responsibility, community resilience, human security, at disaster risk reduction.
“All these are really meant to make our children make our learners be aware that they have to seek peaceful resolutions to conflicts even in the classrooms,” dagdag ni Dir. Jocelyn Andaya.
VP Duterte, umaasang magbibigay ng makabuluhang learning experience ang K to 10 curriculum sa mga estudyante
Sabi ng DepEd, magsasagawa ng pilot implementation ng K to 10 curriculum ngayong school year sa ilang piling eskuwelahan.
Habang ang full implementation nito ay ipatutupad sa buong bansa kada yugto.
“We are optimistic that this will provide our children with a meaningful learning experience that will boost their intelligence, improve their knowledge, enhance their skills and talents, and prepare them to become well-rounded, mature individuals,” ani VP Sara.
