BILANG bahagi ng paghahanda sa Barangay at Sangguniang Kabataan (SK) Elections, lumagda ang Philippine National Police (PNP) at Commission on Elections (COMELEC) sa isang data sharing agreement.
Pinangunahan ito nina PNP chief Police General Benjamin Acorda, Jr., PNP Director for Operations Police Brigadier General Leo Francisco, COMELEC chairman George Garcia, COMELEC commissioner Nelson Celis, at COMELEC executive director Teopisto Elnas Jr.
Sa ilalim ng kasunduan, pinahihintulutan ang COMELEC na ma-access ang Election Monitoring Systems at sub-system ng PNP.
Kabilang dito ang PNP Personnel Deployment, Surrendered Firearms, Voting Center Assistance, Election Status, Candidates, Party-lists, Voting Center, Treasurer’s Office, Unlawful Election Materials, Gun Ban Details and Violations, at iba pang critical data na may kaugnayan sa halalan.
Dagdag din sa access ang sub-systems ng PNP Election Monitoring System tulad ng geo-tagging para sa vote-buying at fake news.
Sinabi ni Acorda na sa pagtutulungan ng PNP at COMELEC ay makakagawa sila ng mahusay at angkop na hakbang upang matiyak ang ligtas, patas, at maayos na halalan.
