MARIING pinabulaanan ng general manager ng Mactan-Cebu International Airport (MCIA), Julius Neri, na mayroong insidente ng laglag-bala sa paliparan.
Nilinaw ni Neri na wala pang naitalang insidente ng “laglag-bala” sa MCIA mula noon. Kung may natagpuang bala sa bag ng isang pasahero, ito ay dala ng pasahero nang sinasadya o hindi sinasadya at hindi inilagay doon.
Ang naturang pahayag ni Neri ay tugon sa isang kontrobersiyang kinasasangkutan ng isang 47-anyos na human resource manager na natagpuang may dalang apat na bala sa kanyang hand-carry baggage.
Ang babae ay nahuli ng mga awtoridad sa X-ray security screening ng paliparan noong Huwebes, Marso 27, habang papunta sana sa Tacloban, Leyte.
Nilinaw ng regional chief ng Office for Transportation Security (OTS), Lizel Mondejar, na nangyari ang insidente alas-3:45 ng hapon noong Huwebes nang suriin ng x-ray operator ang bag sa X-ray machine at makita ang mga bala.
Ayon sa protocol, nakipag-ugnayan ang mga tauhan ng OTS sa Philippine National Police Aviation Security Group (PNP-Avsegroup) at binuksan ang bagahe na may pahintulot ng pasahero. Nakumpirma ang apat na bala sa loob ng pouch.
Ang nahuli, na residente ng Lungsod ng Lapu-Lapu, ay sinampahan ng paglabag sa Republic Act No. 10591 at sa Commission on Elections (COMELEC) gun ban o Resolution No. 11067 sa Lapu-Lapu City Hall of Justice.
Follow SMNI News on Rumble
