ARESTADO sa isang entrapment operation sa Ninoy Aquino International Airport (NAIA) Terminal 3 ang isang Japanese national at isang Filipina dahil sa umano’y human trafficking at large-scale illegal recruitment.
Naganap ang operasyon nitong gabi ng Biyernes, Mayo 9, 2025, sa pangunguna ng Department of Migrant Workers (DMW) katuwang ang NAIA Task Force Against Trafficking at Bureau of Immigration (BI).
Ayon sa DMW, ang operasyon ay isinagawa matapos makatanggap ng reklamo mula sa dalawang Pilipinong biktima.
Kinilala ang mga suspek na sina Tomita Takayuki, isang Japanese national, at Maria Zenaida Callos Otani, isang Filipina.
Nahaharap na sila ngayon sa mga kasong qualified trafficking in persons at large-scale illegal recruitment.
Nahuli ang dalawa habang sinusubukang palabasin ng bansa ang 13 Pilipino, na pinangakuan umano ng trabaho bilang mga factory worker sa Japan.
Lumitaw sa imbestigasyon na ginamit ng mga suspek ang pekeng ahensiyang Winkbayside Manpower Services, na kalauna’y napatunayang hindi rehistrado.
Inalok ang mga biktima ng trabaho sa ilalim ng Technical Intern Training Program ng Japan, na may buwanang sahod na 120,000 yen. Ngunit pagdating doon, hindi sila isinailalim sa nasabing programa. Sa halip, ipinasa sila sa iba’t ibang kompanya upang magtrabaho gamit ang mga pekeng dokumento.
Lalong lumala ang sitwasyon nang malaman ng mga biktima na ang tunay na sahod para sa kanilang trabaho ay 200,000 yen, ngunit sila’y binabayaran lamang ng 120,000 yen.
Sa direktiba ni Usec. Bernard Olalia, Undersecretary for Licensing and Adjudication Services ng DMW, naisagawa ang entrapment operation sa tulong ng Migrant Workers Protection Bureau, NAIA Task Force Against Trafficking, at NBI – International Airport Investigation Division.
Hinimok ng MWPB ang mga posibleng dating nabiktima ng parehong grupo na makipag-ugnayan sa kanilang tanggapan para makapaghain ng kaso. Maaari silang magpadala ng mensahe sa opisyal na Facebook page ng ahensya: https://www.facebook.com/dmwairtip para sa agarang legal na tulong.
“Ang advice natin sa mga kababayan natin na nagnanais na magtrabaho hindi lamang sa Japan kundi sa iba’t ibang lugar, na huwag kayong papatol sa mga ahensyang hindi rehistrado at walang lisensya mula sa aming departamento,” ayon kay Usec. Bernard Olalia, DMW.
“Pag hindi dumaan sa DMW from the Philippine perspective, illegal ‘yun and our illegal recruitment laws are so strong na kapag nag-recruit ka na walang DMW license for overseas employment, that’s illegal recruitment,” pahayag ni Sec. Hans Leo Cacdac, DMW.
Kaugnay rito, pinuri ng BI ang matagumpay na operasyon na nauwi sa pagkakaaresto ng dalawang recruiter na nagtangkang ilabas ng bansa ang 13 Pilipino, karamihan ay kababaihan.
Ayon sa BI, ito na ang ika-16 na matagumpay na operasyon kontra human trafficking sa unang bahagi pa lamang ng taon.
Ayon kay BI Commissioner Joel Anthony Viado, ang kanilang pagkilos ay bunga ng intel na natanggap mula sa DMW. Sa isinagawang secondary inspection, nadiskubreng pineke ang mga dokumento ng mga biktima at ang kanilang paglabas ng bansa ay pinalalabas na para sa TITP, na pawang kasinungalingan.
Na-turn over na sa Inter-Agency Council Against Trafficking ang mga suspek para sa imbestigasyon at pagsasampa ng kaukulang kaso.
Ayon pa sa DMW, mahigit 200 na ang naaresto ngayong taon kaugnay ng illegal recruitment.
Patuloy ang paalala ng mga ahensiya sa publiko: huwag basta magtiwala sa mga ahente o kumpanyang walang tamang akreditasyon. I-report agad sa kinauukulan ang anumang kahina-hinalang alok ng trabaho sa ibang bansa.
