INISYUHAN na ng show cause order ng Land Transportation Office (LTO) ang may-ari ng sports car na dumaan sa EDSA Bus Lane.
Sa show cause order, inatasan ang may-ari at driver ng Red Ferrari F8 Tributo na may plate number 8999 na humarap sa LTO Central Office-Intelligence and Investigation Division sa Lunes, Oktubre 24, ganap na alas 10 ng umaga.
Inatasan din ang driver na magsumite ng paliwanag kung bakit hindi dapat kanselahin o tuluyang tanggalan ng lisensya sa pagmamaneho.
Sakaling hindi magpakita o magsumite ng paliwanag, sinabi ng LTO na tinatanggalan na ng mga ito ang kanilang sarili na makapaghain ng kanilang panig.
Ang EDSA Bus Lane o Carousel Lane ay nakalaan lang sa public utility buses, ambulansya at authorized marked government emergency vehicles.
