NAGKAROON ng pagpupulong kamakailan ang mga opisyal ng National Anti-Poverty Commission (NAPC) at Philippine Reclamation Authority (PRA).
Layunin ng pulong na buuin ang mga programa para sa mga kababayan nating apektado ng reclamation projects sa buong bansa.
Partikular sa tututukan ang mga mangingisdang nawalan ng tirahan.
“We are trying to provide livelihood opportunities such as creating bancas. We are providing other livelihood opportunities and trainings for those that maybe displaced,” ayon kay Atty. Alex Lopez, Chairman, Philippine Reclamation Authority.
Kabilang din sa napagkasunduan ng PRA at NAPC ang pagtatayo ng ospital sa mga apektadong sektor.
Sakop din ng programa ang mga magsasakang apektado ng reclamation projects.
Tiniyak din ni Lopez na magkakaroon ng disenteng resettlement areas ang mga nawalan ng tirahan dahil sa mga proyekto ng pamahalaan.
“We have plenty of land which we are working with the Pasay City Government right now, and hopefully with all the other local governments where we have reclamation projects for their vendors to have places,” ani Lopez.
Katunayan, diin ni Chairman Lopez, naghahanap na ang PRA ng mga lupang pagtatayuan ng paglilipatang bahay.
Katuwang ng PRA at NAPC sa programang ito ang Department of Labor and Employment (DOLE) at Technical Education and Skills Development Authority (TESDA).
Kasama rin sa tutulungan ang mga vendor na nawalan ng puwesto dahil sa development sa reclaimed sites.
