MAHIGPIT pa ring susubaybayan ang mga galaw ni dating Cong. Arnie Teves Jr. sa Timor-Leste.
Ito ang naging pahayag ng Department of Justice (DOJ) kasabay ng kumpirmasyon na nakalaya na sa house arrest ang dating kongresista.
Ayon sa DOJ, opisyal nang natapos ang house arrest ni Teves noong Biyernes, Hunyo 21, alas-6 ng gabi, sa Pilipinas.
Maaari lang anila kasi na ma-detain sa loob ng 90-araw si Teves batay sa batas ng Timor-Leste.
Saad ni DOJ Spokesperson Asec. Mico Clavano, sa kabila ng paglaya ni Teves a house arrest ay hindi ito maaring lumabas ng Timor-Leste hangga’t wala pang pinal na desisyon ang korte sa extradition request ng PH Government.
“We confirm the release of Teves from house arrest. However, he will strictly be not allowed to leave Timor-Leste until a final ruling on his extradition has been reached,” pahayag ni Asec. Mico Clavano, Department of Justice.
Aniya, babantayan ng mga awtoridad doon ang lahat ng mga border – sa hangin, lupa, at dagat – upang tiyakin na hindi makakalabas si Teves ng Dili, Timor-Leste.
Tiniyak ani DOJ ng Timor-Leste Government na hindi lalabas ng naturang bansa ang dating kongresista.
“The obvious goal of the other camp is to leave Timor-Leste and rejoin his family in another country. This is why all boarders have been notified that Teves is a flight risk. However, the Timor-Leste government assures us that he will not leave,” saad ni Asec. Mico Clavano, Department of Justice.
Si Teves ay nahaharap sa patong-patong na kaso ng murder sa Pilipinas dahil sa nangyaring assassination kay Negros Oriental Gov. Roel Degamo noong Marso 4, 2023.
