INAPRUBAHAN ni Pangulong Ferdinand R. Marcos, Jr. ang pagtatalaga ng Cabinet Officers for Regional Development and Security (CORDS) para sa National Task Force to End Local Armed Conflict (NTF-ELCAC).
Sa inilabas na press statement ng NTF-ELCAC nitong Hulyo 20, nakasaad dito na ang naturang designation ay base sa rekomendasyon ng Executive Committee mula sa isang pulong na pinangunahan ni Executive Secretary Lucas Bersamin noong Mayo 10, 2023.
Batay sa EXECOM Resolution No. 1, ang piling cabinet secretaries ay itinalaga upang pamunuan ang Joint Regional Task Forces (JRTF-ELCAC) para pangasiwaan ang peace and development efforts sa bawat rehiyon ng bansa.
Kabilang sa mga bagong itinalagang CORDS ay sina:
DMW Sec. Maria Susana Ople para sa National Capital Region (NCR); DOTR Sec. Jaime Bautista sa Cordillera Administrative Region (CAR); DAR Sec. Conrado Estrella III sa Region I; DTI Sec. Alfredo Pascual na naka-designate sa Region II; DSWD Sec. Rex Gatchalian sa Region III; at DOJ Sec. Jesus Crispin Remulla para sa Region IV-A;
Kasama rin sa itinalagang Cabinet Officers for Regional Development and Security sina:
- Region IV-B – Sec Ivan John Uy, DICT
- Region V – Sec. Bienvenido Laguesma, DOLE
- Region VI – Sec. Raphael Perpetuo Lotilla, DOE
- Region VII – Sec. Maria Esperanza Cristina Frasco, DOT
- Region VIII – Sec. Benhur DC Abalos Jr, DILG
- Region IX – Sec. Manuel Bonoan, DPWH
- Region X – Sec. Jose Rizalino Acuzar, DHSUD
- Region XI – Sec. Leo Tereso Magno, Presidential Assistant for Eastern Mindanao
- Region XII – Sec. Ma. Antonia Yulo-Loyzaga, DENR
- CARAGA – Sec. Allen Capuyan, NCIP
- BARMM – Sec. Carlito Galvez, OPAPRU
Ang itinalagang CORDS ay magpapadali sa pamamahala ng Whole-of-Nation approach at Whole-of-Government participation at magtataguyod ng good governance upang makamit ang inclusive at sustainable peace.
Tutulong ang mga ito sa pagpapahayag ng concerns at perceptions ng rehiyon doon sa gabinete, kasama ang iba pang mga departamento, gayundin sa Office of the President at mga kinauukulang ahensiya.
Pangungunahan din ng CORDS ang joint meetings ng Regional Peace and Order Council (RPOC) at ng Regional Development Council (RDC) upang pagtugmain ang mga pagsisikap sa kapayapaan, seguridad at pag-unlad sa kanilang mga assigned region.
Ang NTF-ELCAC ay pinamumunuan ni Pangulong Marcos bilang chairperson; Vice President Sara Duterte at Secretary Eduardo Año bilang co-vice chairpersons; at Undersecretary Ernesto Torres, Jr. bilang executive director ng National Secretariat.
