INANUNSIYO ng kampo ni President-elect Bongbong Marcos ang susunod na Chairman ng Commission on Audit (COA) sa katauhan ni Solicitor General (SolGen) Jose Calida.
Si Calida ang dalawang bagong appointments na pinangalanan ngayong hapon sa ilalim ng Bongbong Marcos administration.
“Jose Calida for COA Chair,” anunsiyo ni Atty. Trixie Cruz-Angeles, incoming Press Secretary.
Inilahad naman ni Cruz-Angeles ang naging karanasan ni Calida sa ilang ahensiya ng pamahalaan.
“As you know he is the former solicitor general under President Duterte. He is also a former undersecretary of justice and also formerly with the dangerous drugs board,” ayon kay incoming Press Secretary.
Kilala si Calida bilang matapang na tagapagtanggol ni Pangulong Rodrigo Roa Duterte.
Papalitan naman ni Calida si Rizalina Noval Justol bilang ad interim COA chairman.
Habang si Calida bilang SolGen ay papalitan ni outgoing Justice Secretary Menardo Guevarra.
Samantala, ang ikalawang pinangalanan ay ang susunod na General Manager at President ng GSIS si dating CEO ng Philippine National Bank (PNB).
“President and general manager of GSIS Jose Arnulfo ‘Wick’ Veloso. He was the president and CEO of PNB. He also used to be with the HSBC one of the highest ranking Filipinos there,” ayon kay Cruz-Angeles.
Ang mga pinakaabangang kalihim ng Department of Health (DOH), Department of Energy (DOE), at Department of Foreign Affairs (DFA) ay nanatiling wala pang appointments.
Pero ayon sa kampo ni PBBM, hindi dapat minamadali ang pagpili.
“Sinusuri pa po kasi nila as you know nagtalaga pa tayo ng application process at saka mayroong proseso para sa pag-i-evaluate. Dahil nga sinasabi ninyo na mahalaga yung mga posisyon na ito, hindi puwedeng madaliin yung proseso,” ayon naman ni Cruz-Angeles.
