DAPAT na mahigpit na ipatupad ng mga local government units (LGUs) lalo na sa Metro Manila ang water conservation measures sa loob ng kani-kanilang lugar.
Ito ay upang makatulong na maiwasan ang pagkaputol ng suplay kahit na patuloy na natutuyo ang mga dam dahil sa matagal na dry spell dulot ng El Niño.
Ginawa ni Interior and Local Government Secretary Benhur Abalos ang panawagan matapos lumabas sa mga ulat na patuloy na bumababa ang lebel ng tubig sa Angat Dam, isang mahalagang pinagmumulan ng tubig para sa National Capital Region (NCR), dahil sa El Niño.
Ang mga ulat ay nagpahiwatig na ang antas ng tubig ng Angat Dam ay inaasahang tatama sa pinakamababang antas ng pagpapatakbo nito bago matapos ang buwang ito, maliban kung ang mga pag-ulan ay dumating nang mas maaga kaysa sa inaasahan.
Bilang isa sa mga precautionary measures, mababawasan ang alokasyon ng tubig para sa irigasyon at supply ng sambahayan sa NCR at mga karatig probinsiya ng Cavite, Rizal, at Bulacan.
Upang matugunan ang nakaambang problema, inilabas ni Abalos ang DILG Memorandum Circular (MC) No. 2024-065, at nanawagan sa lahat ng lokal na punong ehekutibo, kabilang ang mga punong barangay, na magsagawa ng regular na pagsubaybay sa mga metro ng tubig at agad na iulat ang mga pagtagas sa mga kinauukulang tagapagbigay ng serbisyo ng tubig.
Dapat aniyang tiyakin ng mga LGU na ang lahat ng tanggapan ng gobyerno ay may hiwalay na metro ng tubig upang madaling masubaybayan ang pagkonsumo ng tubig at posibleng pagtagas.
Ang mga balbula ng tubo ng tubig sa pangunahing gusali ay dapat isara mula 7pm hanggang 6am, at dapat na regular na suriin ng mga administrator ng gusali kung may mga tagas at may sira na mga kabit lalo na sa mga palikuran.
