IPINAUUBAYA na ng Land Transportation Franchising and Regulatory Board (LTFRB) sa mga magpaparehistro ng pampublikong sasakyan kung anong insurance provider ang nais nitong tangkilikin.
Alinsunod ito sa Department Order (DO) 2018-020 o ang “Revised Guidelines on Mandatory Insurance Policies for Motor Vehicles and Personal Passenger Accident Insurance (PPAI) for Public Utility Vehicles ng Department of Transportation (DOTr).
Nakasaad sa naturang polisiya na malayang makapipili at kumuha ng insurance policies ang kuwalipikadong insurer ang mga aplikante.
Ang lahat ng insurance premium ay istriktong babayaran sa mga opisina o authorized collection sites ng qualified insurers.
“For Personal Passenger Accident Insurance (PPAI), the instruction is to accept policy from insurance providers duly accredited by the Insurance Commission. As regards Third-Party Liability (TPL) insurance policy, operators are free to choose and secure the same from any insurance company accredited by the Insurance Commission,” saad ni Atty. Teofilo Guadiz III, Chairperson, LTFRB.
Pinaalalahanan din ng mga Regional Franchising and Regulatory Office ng ahensiya na mahigpit na sundin ang Citizen’s Charter ng ahensiya.
Kabilang na ang mga probisyon sa ilalim ng Republic Act No. 11032, o ang “Ease of Doing Business and Efficient Government Services Delivery Act of 2018”.
Pinabulaanan din ni Chairman Guadiz ang mga napaulat na umano’y plano ng LTFRB na magdagdag ng insurance provider na pagpipilian ng mga aplikante ng pampublikong sasakyan.
Tanging ang Insurance Commission lamang at hindi ang LTFRB ang may hurisdiksiyon na mag-accredit ng mga bagong kompanya ng insurance na maaaring pagpilian ng mga aplikante.
