AABOT sa apat na milyong pisong halaga ng shabu ang nasabat ng Bureau of Customs (BOC) NAIA, Philippine Drug Enforcement Agency (PDEA), at NAIA Inter-Agency Drug Interdiction Task Group sa controlled delivery operations sa Las Piñas City.
Naaresto sa operasyon ang isang residente ng Pasay City at kasamang Nigerian national matapos matanggap ang package sa Marcos Alvarez Avenue corner Veraville Homes, Talon Singko, Las Piñas City.
Ayon sa BOC, natagpuan ang 588 gramo ng crystalline substances na nakabalot sa aluminum foil at nakatago sa loob ng isang baby bottle sterilizer at dryer.
Batay sa record, ipinadala ang package mula Laos at idineklara bilang “electric steamer.”
Kasalukuyang sumasailalim ang claimants sa custodial investigation at pagkatapos ay inquest prosecution para sa paglabag sa Comprehensive Dangerous Drugs Act of 2002 na may kaugnayan sa seksyon 119 at 1401 sa RA 10863 na kilala bilang Customs Modernization and Tariff Act (CMTA).
