CALOOCAN CITY, Philippines — Isang malakihang drug bust ang isinagawa ng Philippine National Police (PNP) sa Barangay Amparo, North Caloocan, kung saan nasabat ang tinatayang P74.8 milyon halaga ng hinihinalang shabu nitong Linggo, Abril 27, 2025, bandang alas-otso ng gabi.
Ayon sa ulat ng mga awtoridad, ang nakumpiskang droga ay tumitimbang ng labing isang (11) kilo, at nakuha sa pamamagitan ng buy-bust operation na ikinasa ng mga operatiba ng PNP Drug Enforcement Group.
Dalawang indibidwal ang agad na naaresto sa aktong pagbebenta ng ilegal na droga, at kasalukuyang nakakulong habang inihahanda na ang mga kasong paglabag sa Republic Act 9165 o ang Comprehensive Dangerous Drugs Act of 2002 laban sa kanila.
“Ang operasyon na ito ay patunay ng patuloy nating kampanya laban sa droga. Hindi tayo titigil hangga’t may mga sindikatong patuloy na sumisira sa ating kabataan at komunidad,” ayon sa pahayag ng opisyal mula sa PNP.
