NANAWAGAN si Pangulong Ferdinand R. Marcos, Jr. sa mga ahensiya ng gobyerno na magbigay ng higit na suporta para sa research and development (R&D) partikular sa larangan ng kalusugan at agham at teknolohiya.
Ang kautusan ay ginawa ng Pangulo kasabay ng paggawad nito ng Order of National Scientists (ONS) at ng Presidential Medal of Merit sa dalawang natatanging opisyal nitong Agosto 31.
Sa kaniyang mensahe, binigyang-diin ni Pangulong Marcos ang kahalagahan ng pagpapaigting ng research and development (R&D) sa iba’t ibang sektor para sa pagharap ng bansa sa mga bagong hamon.
Aniya, kasama ang mga kaugnay na industriya, bubuo ang pamahalaan ng programa para mabigyang-pansin ang mga aktibidad patungkol sa R&D at magamit ng publiko ang mga pag-aaral na magiging bunga nito.
“Dahil napakahalaga para sa ating mga kababayan na itong R&D, hindi lamang sa healthcare kundi sa lahat ng sektor ng ating ekonomiya, ng ating lipunan, ay dapat bigyan ng pansin.”
“We need to now be very conscientious and put together a program wherein we can support, in whatever way that the government can, on research and development,” saad ni Pangulong Ferdinand R. Marcos, Jr.
Ilan sa mga sakit na napag-usapan sa pagitan ng Pangulo at ng mga awardee ay ang diabetes, cancer, tuberculosis, at HIV, na nagiging karaniwan na sa bansa.
Binanggit din ng Pangulo na napag-usapan nila ang mga mahusay na paraan upang maihatid ang mga bagong teknolohiya sa merkado sa lalong madaling panahon.
Plano rin ng Punong-Ehekutibo na isama ang pribadong sektor sa nasabing pagsisikap para sa isang whole-of-society approach.
“The government will of course do its part. But I think we will multiply our efforts, there will be a multiplier effect if we include all the sectors of government and also our private sector partners. And so this is what we are planning to do today. This is what we are planning to do for the future,” dagdag ni Pangulong Marcos.
PBBM, ginawaran ng Presidential Awards ang mga natatanging Pilipino sa larangan ng agham at kalakalan
Nitong Huwebes, iginawad ni Pangulong Marcos ang Order of the National Scientist kay Dr. Carmencita Padilla at ang Presidential Medal of Merit kay Department of Trade and Industry Assistant Secretary Allan Gepty.
Ginanap ito sa isang seremonya sa Palasyo ng Malacañang nitong umaga ng Huwebes.
“Both Dr. Padilla and Asec. Gepty exemplify what it means to be a public servant and these awards are our form of recognition and a testament to that service,” ani Pangulong Marcos.
Sa isang conferment ceremony, kinilala ng Pangulo si Dr. Padilla sa kaniyang mga kontribusyon at kadalubhasaan sa larangan ng Genetics na may mahalagang papel sa pagpasa ng Republic Act (RA) No. 9288, o ang Newborn Screening Act of 2004, RA 10747, o ang Rare Diseases Act of 2016, at ang kaniyang kamakailang pangunguna sa pagtatatag ng Philippine Genome Center.
Ang Newborn Screening Act ay kilala na nagligtas sa libu-libong mga sanggol sa buong bansa mula sa mental retardation at kamatayan.
Habang ang Rare Diseases Act ay nagpoprotekta at nagtataguyod ng karapatan sa kalusugan ng mga Pilipino.
Ang Philippine Genome Center naman ang nangunguna sa pagtugon ng bansa sa pandemya.
Nagbigay rin ito sa gobyerno at sa policy makers ng bansa ng impormasyong kailangan upang mas maunawaan ang virus at magpatupad ng mga hakbang para limitahan at pangasiwaan ang pagkalat nito.
Binigyang-diin naman ni Dr. Padilla ang kahalagahan ng pagkakaroon ng bansa ng sariling genome center.
Patungkol naman sa Research and Development, inatasan ni Pangulong Marcos si Dr. Padilla na mag-compile ng isang programa kasama ang DTI, Department of Science and Technology (DOST), at Department of Health (DOH), upang masuportahan ang mga aktibidad sa mga tuntunin ng R&D at upang aktuwal na dalhin ang teknolohiya sa pangkalahatang mamamayan.
Sa kabilang banda, pinuri ni Pangulong Marcos si Assistant Secretary Gepty sa kaniyang napakahalagang kontribusyon sa mga negosasyon kaugnay ng ratipikasyon ng Regional Comprehensive Economic Partnership (RCEP).
Ang RCEP ay kilala bilang pinakamalaking trade bloc sa mundo na inaasahang magbubukas ng mga oportunidad para sa mga Pilipino at Philippine companies na mag-export ng kalakalan sa loob ng RCEP region.
