INATASAN ni Pangulong Ferdinand R. Marcos, Jr. ang Anti-Money Laundering Council (AMLC) at lahat ng kinauukulang ahensiya ng gobyerno na tugunan ang mga natitirang strategic deficiencies na mag-aalis sa Pilipinas sa global money laundering ‘grey list’.
Ang strategic deficiencies na ito ay tinukoy ng Financial Action Task Force (FATF).
Inihayag ito ni AMLC Executive Director Matthew David sa press briefing sa Malacañang nitong Martes, Enero 2, 2024.
“The President has reiterated the government’s high-level political commitment and directed all government agencies concerned to swiftly address the remaining strategic deficiencies identified by the FATF in relation to the grey listing of the Philippines,” ayon kay Atty. Matthew David, Executive Director, AMLC.
PH, target na maalis sa “grey list” kaugnay ng money laundering at terrorist financing ngayong Enero
Kaugnay dito, nilalayon ng pamahalaan ng Pilipinas na alisin ang bansa mula sa grey list ng Financial Action Task Force ngayong Enero ng taong kasalukuyan.
Kung matatandaan, nabigo ang Pilipinas na matugunan ang isyu sa itinakdang deadline noon pang Enero 2023.
Noong 2021, inilagay ang Pilipinas at ilan pang bansa sa “grey list” ng mga bansa sa ilalim ng pinaigting na monitoring kontra money laundering at terrorist financing.
“The aim of the government is to exit grey list this January 2024. That was a self-imposed deadline, but we are still hopeful that we will exit the grey list this year, 2024,” dagdag ni David.
Inihayag ng Financial Action Task Force, isang international organization na tumutugis sa money laundering at terrorism financing, na nakikipag-ugnayan dito ang mga bansang kasama sa listahan para iwasto ang mga kakulangan sa financial systems ng mga ito.
Action plan para malutas ang grey list status ng Pilipinas, inilatag ng AMLC
Ang Pilipinas ay orihinal na nakatanggap ng 18 action plan item para malutas ang grey list status nito sa 2021.
Sa kasalukuyan ay mayroon itong walong natitirang action plan na kailangang tugunan.
Kabilang sa mga natitirang action plan na ito ang pagsasaayos ng finance entities, pagpapaigting ng money laundering at terrorism financing investigations, at mahigpit na pagpapatupad ng cross-border measures, kabilang ang mga daungan at paliparan.
Binigyang-diin din ni Atty. David ang pangangailangang mapabilis ang pagtanggal sa Pilipinas sa naturang listahan.
“There are precautions for being on the grey list, because the longer we are on the grey list, the bigger the possibility or the higher the risk that we will enter the black list. Of course, we don’t want to be in the blacklisted jurisdiction,” ani David.
Transaksiyon ng OFWs, apektado kapag ma-blacklist ang Pilipinas—AMLC
Nagbabala naman ang AMLC official na kung ma-blacklist ang Pilipinas, magkakaroon ito ng epekto sa mga transaksiyon ng mga overseas Filipino worker (OFW).
Tinalakay ni David na ang FATF ay maaaring magpataw ng countermeasures sa Pilipinas at international financial transactions ng mga Filipino sa ibang bansa sakaling ma-blacklist ang bansa.
Ang mga ito ay maaaring mangahulugan ng pagtaas sa halaga ng remittance services at mas mahigpit na requirements.
Ipinunto pa ng AMLC official na maaaring mayroon ding mas mataas na panganib para sa mga transaksiyon na tanggihan o hindi maaprubahan.
“And if we will be on the blacklisted list, there are repercussions to that and one of the repercussions is the effect on our transactions of our OFWs,” ani David.
Sa sectoral meeting sa Malacañang, inihayag ni Atty. David na binigyang-diin ng Pangulo ang kaniyang utos na palakasin ang mga pagsisikap na magtitiyak na ang Pilipinas ay hindi magiging money laundering site para sa anumang ‘unlawful activities’ sa pamamagitan ng Executive Order No. 33 na inilabas noong nakaraang taon.
