Maynila — Ilang araw bago ang 2025 national at local elections, muling nanawagan ang Parish Pastoral Council for Responsible Voting (PPCRV) ng karagdagang volunteers na makakatulong sa pagbabantay ng boto sa mismong araw ng halalan.
Sa kasalukuyan, nasa 350,000 volunteers na ang naitalang kasapi ng PPCRV, ayon kay National Coordinator Dr. Arwin Serrano. Ngunit dahil sa lawak ng eleksyon at dami ng presinto sa buong bansa, bukas pa rin ang kanilang recruitment para sa mga nais mag-volunteer, anuman ang relihiyon, basta’t non-partisan.
“Magpalista lamang po kayo sa pinakamalapit na Katolikong parokya. Hindi ninyo kailangang maging Katoliko — basta’t handang maglingkod nang tapat at walang kinikilingan,” saad ni Serrano.
Dagdag pa niya, ang maagang paghahanda — kabilang ang paglista ng mga ibobotong kandidato — ay mahalaga upang mapabilis ang proseso ng pagboto at maiwasan ang pagkaantala sa presinto.
Bilang paghahanda rin sa mga posibleng kalamidad gaya ng aktibidad ng Bulkang Kanlaon, nilagdaan na ng COMELEC at Office of Civil Defense ang isang Memorandum of Agreement para sa emergency response protocols.
Kasama sa mga contingency plans ang:
Express lanes para sa responders, PWDs, senior citizens, at buntis
Emergency voting centers kung hindi ligtas ang orihinal na mga presinto
Real-time monitoring ng direksyon ng hangin at posibleng ashfall
“Ang mahalaga ay walang botanteng mawalan ng pagkakataon makaboto — kahit may emergency,” ani Serrano.
