NAGPAHAYAG ng pasasalamat si Defense OIC Senior Undersecretary Jose Faustino Jr. sa gobyerno ng Norway sa patuloy na pagsuporta sa kapayapaan at kaunlaran sa bansa.
Ito ay kasunod ng courtesy call ni Kristina Revheim, Special Representative of Norway to the Philippines on Peace Processes sa Camp Aguinaldo, Quezon City.
Kasama ni Revheim si William Hovland, Manila-based Senior Advisor mula sa Norwegian Center for Conflict Resolution at Vice-Chair ng Independent Decommissioning Body (IDB), na nangangasiwa sa decommissioning ng mga pwersa at armas ng Moro Islamic Liberation Front (MILF).
Naging makabuluhan ang pulong ng mga opisyal ng Pilipinas at Norway lalo na sa usapin ng peace and reconciliation, localized peace engagement at normalization process sa Bangsamoro Autonomous Region in Muslim Mindanao (BARMM).
Maliban dito, kinilala rin ni Faustino ang mahalagang kontribusyon ng Norway bilang third-party facilitator sa usapang pangkapayapaan kasama ang National Democratic Front (NDF).
