INILAHAD ni Vice President at Department of Education (DepEd) Secretary Sara Duterte ang Basic Education Report 2024 sa isinagawang pagtitipon sa Sofitel noong Enero 25, 2024.
Ang okasyon ay dinaluhan ng Pangulong Ferdinand R. Marcos, Jr.
Sa kaniyang komprehensibong ulat, ipinaliwanag ni VP Duterte ang mga tagumpay ng departamento sa nagdaang taon na naaayon sa MATATAG Agenda.
Ibinahagi nito ang mga kasalukuyan at hinaharap na mga inisyatiba na layuning tuparin ang mga pangarap ng bawat batang Pilipino.
Sa kaniyang mensahe, binigyang-diin ng Kalihim ang katatagan na nakaukit sa kuwento ng Pilipino.
Kabilang ang mahalagang papel ng edukasyon sa pagbibigay ng kakayahan sa mga indibidwal na tuparin ang kanilang mga pangarap at maging inspirasyon para sa mga susunod na henerasyon.
“Habang ating nasaksihan ang magkakaibang mukha ng tagumpay at mga pangarap na natupad, ipagpatuloy natin ang pagiging matatag sa kabila ng iba’t ibang mga hamon. Saksihan natin ang iba’t ibang bahagi ng tagumpay at ang mga realisasyon ng mga pangarap dahil tayo ay MATATAG,” ayon kay VP at Education Secretary Sara Duterte.
Hinimok nito ang buong bansa na itanim ang katatagan sa mga kabataan para sa isang matatag na kinabukasan at hinihikayat ang lahat na dalhin ang katatagan na ito sa kanilang sarili upang itayo ang inaasam na bansang MATATAG.
“Ipagpapatuloy natin. Hindi tayo bibitaw. Hanggang sa mabali natin ang kurba. Hanggang sa tuparin natin ang pangarap ng bawat batang Pilipino,” aniya.
Nagpahayag ng pasasalamat ang Kalihim sa mga stakeholders, kabilang na ang mga guro, mag-aaral, at iba’t ibang mga kasamahan, sa kanilang hindi naglalahong suporta sa pagtataguyod ng pangarap ng isang MATATAG na Pilipinas.
Lubos din nitong pinasalamatan si Pangulong Marcos sa kaniyang pagdalo at patuloy na suporta.
Kasama rin sa pagtitipon ang mga senador na sina Pia Cayetano at Win Gatchalian, na nagpapakita ng pagsasama ng Kagawaran ng Edukasyon at ng lehislatura.
Sa pagwawakas, nagpasalamat ang Kalihim sa halos 900,000 indibidwal na bumubuo ng Kagawaran ng Edukasyon, na binigyang-diin ang kahalagahan ng bawat papel sa kanilang kolektibong misyon.
Ang mga pagbabago at pag-unlad sa larangan ng edukasyon na ipinresenta sa ulat ay bunga ng mga pagbisita sa paaralan, diyalogo sa mga guro, mag-aaral, at iba’t ibang stakeholders, na nagpapakita ng dedikasyon sa pagtatayo ng isang matatag at umuunlad na bansa.
Ang lahat ng pagsusumikap, tulad ng paulit-ulit na ipinapaalala ni Secretary Duterte, ay iniaalay sa Diyos, sa Bayan, at sa bawat pamilyang Pilipino.
