IPATUTUPAD na ng Land Transportation Franchising and Regulatory Board (LTFRB) simula ngayong araw ang ilang pagbabago sa passenger capacity load sa Public Utility Vehicles (PUVs) sa buong bansa hanggang Enero 4, 2022.
Base sa Memorandum Circular na inilabas ng LTFRB, mananatili sa 70% ang passenger capacity load sa PUVs sa National Capital Region (NCR) at mga probinsiya ng Bulacan, Cavite, Laguna, at Rizal.
Para naman sa mga rehiyon na 50% passenger capacity load ang naipapatupad sa mga PUV ngunit mayroon ng 30% vaccination rate ngayong Disyembre, maaari nang iakyat sa 70% ang kanilang passenger capacity load.
Paliwanag pa ng LTFRB, sa ibang rehiyon na maaari nang maipatupad ang 70%passenger capacity ngunit hindi pa nakukumpirma ang 30% vaccination rate, kailangang magsumite ng Regional Franchising and Regulatory Board ng Memorandum to the Board kasama ang Certification of Vaccination Rate na manggagaling sa Regional Inter Agency Task Force o Department of Health Regional Office.
Para sa Inter-Regional routes, lalo na ang papuntang Metro Manila kailangan pa rin nilang sundin ang passenger capacity ng pinanggalingang rehiyon.
Pinapaalala ng LTFRB sa mga PUB operators na sundin ang mga patakaran ng ahensya.
Ang sinumang mahuli na lalabag sa mga probisyon ng MC ay papatawan ng kaukulang parusa at multa, at maaaring tanggalan ng CPC o PA.
Para sa mga PUB driver, maaari silang matanggalan ng lisensya.
