NASA “high point” o mataas na antas ang relasyon ng seguridad sa pagitan ng Pilipinas at bansang Australia.
Ganito inilarawan ni Australian Deputy Prime Minister at Defense Minister Richard Marles ang relasyon ng dalawang bansa sa usapin ng seguridad.
Ginawa ni Deputy Prime Minister Marles ang nasabing pahayag araw ng Linggo sa pagsisimula ng Philippine-Australia defense ministers formal bilateral meeting sa ika-21 International Institute for Strategic Studies Shangri-La Dialogue.
Sa nasabing pagtatagpo, inalala nina Defense Secretary Gilberto Teodoro at Minister Marles ang kanilang mga napag-usapan at pangako noong nakaraang buwan ng Mayo kasama ang ibang defense secretaries at ministers mula sa United States, Australia, Japan, at ng Pilipinas na ginanap sa US Indo-Pacific Command Headquarters sa Hawaii.
Ang nabanggit na apat na bansa ay nangako na magtutulungan upang masiguro na naipatutupad nang maayos ang international laws sa karagatan.
