EMOSYONAL si Noemi Deng nang humarap sa media.
Siya ang asawa ng Chinese national na si Deng Yuanquing, na inaresto noong nakaraang linggo ng National Bureau of Investigation (NBI) dahil umano sa pang-eespiya sa Pilipinas.
Nagpasaklolo si Noemi kay Filipino-Chinese Community Leader Teresita Ang See at hiniling na makuha ang hustisya para sa kaniyang asawa.
“Hindi po spy si Quing. Matagal na po siyang naninirahan dito sa Pilipinas. Mahigit 10 years na po siya dito,” ayon kay Noemi Deng, asawa ng umano’y Chinese spy.
Noong 2013, nagkakilala sina Noemi, na tubong Zamboanga, at Yuanquing sa pamamagitan ng isang online messaging app at ikinasal noong 2014.
Sa pagkakakilala niya sa kaniyang asawa, iilan lamang ang kaibigan nito, wala itong mga koneksiyon, at wala ring bisyo.
Hindi rin umano graduate si Yuanquing ng People’s Liberation Army University, taliwas sa findings ng NBI. Sa halip, siya ay isang graduate ng vocational technical school.
Patungkol naman sa trabaho ng kaniyang asawa, sinabi ni Noemi na nagsu-survey lamang ito ng kalsada para sa isang self-driving car ng isang Chinese company.
Aniya, ikinagulat niya ang mga akusasyon laban dito.
Dahil umano sa akusasyong ito, ipinangangamba niya ang seguridad ng kanilang anak.
Dalawang beses lamang niyang nakausap si Yuanquing simula nang makulong ito.
“Sabi niya, ‘don’t worry kasi alam kong mapapalaya ako. Kasi wala naman akong kasalanan. Huwag kang mag-alala. Ingatan mo ‘yung sarili mo. ‘Yung anak natin, ingatan mo,” dagdag ni Noemi Deng, asawa ng umano’y Chinese spy.
Paghatol sa isang Chinese national na espiya, isang trial by publicity—Filipino-Chinese community leader
Ayon kay See, lumapit na ang Chinese Embassy sa Department of Foreign Affairs at Department of Justice para sa isang consular visit, pero ayaw umanong ipaharap sa kanila ang nasabing Chinese national.
Sa isang pahayag, iginiit ng embahada na walang basehan ang espekulasyon at mga akusasyon laban sa sinasabing Chinese citizen.
“The so-called “espionage” operation of a Chinese citizen in the Philippines is baseless speculation and accusation,” pahayag ng Chinese Embassy in the Philippines.
Hinihikayat din ng Chinese Embassy ang panig ng Pilipinas na ibatay ang kanilang paghatol sa katotohanan, huwag mag-akusa nang walang sapat na ebidensiya, at itigil ang pagpapalaganap ng mga walang basehang espekulasyon.
“We urge the Philippine side to base its judgment on facts, not to make presumption of guilt, stop airing groundless speculations about the so-called “Chinese spy case,” handle relevant cases in accordance with the law, earnestly fulfill the obligations of the bilateral consular treaty, and protect the legitimate rights and interests of Chinese citizens in the Philippines,” dagdag ng Chinese Embassy in the Philippines.
Iginiit naman ni See na ang ginawa ng awtoridad laban kay Yuanquing ay isang trial by publicity.
“Dapat sana, impartial investigation.”
“Hindi pa nga tayo nag-umpisa, trial by publicity na. Nag-conclude agad kayo na espiya.”
“Nakakalungkot na mas lalo nating pinapagulo ang isyu,” saad ni Teresita Ang See, Human Rights Advocate.
Tatayong abogado nina Noemi at ng kaniyang asawa si Atty. Ferdinand Topacio.
Kiniwestiyon ni Topacio ang ilang ahensiya ng gobyerno na, aniya, nagpalaganap ng takot o pagkamuhi sa mga Tsino.
Aniya, ang pagpapahiya o pagpaparusa sa mga Tsino ay hindi solusyon para resolbahin ang isyu ng dalawang bansa sa mga pinag-aagawang teritoryo sa South China Sea.
“My sense of justice and decency is that ni wala pa ngang paglilitis, kahuhuli pa lamang, wala pang preliminary investigation noon, binansagan nang Chinese spy? Bakit ganoon? What happened to due process? What happened to the presumption of innocence? What happened to the right to a fair trial? Pinrejudice niyo na po ang utak ng mga tao,” wika ni Atty. Ferdinand Topacio.
Follow SMNI News on Rumble
