PUMALAG ang ilang retailers ng frozen o imported na karneng baboy sa itatakdang maximum suggested retail price (MSRP) ng Department of Agriculture (DA) ngayong Agosto.
Imported na karneng baboy ang karaniwang binibili ni Fe Corpuz sa Commonwealth Market sa Quezon City para sa pang-araw-araw na konsumo ng kaniyang pamilya.
Mas abot-kaya kasi ito at pasok sa kaniyang budget, kumpara sa bagong katay o lokal na karneng baboy na halos doble ang presyo.
Umaabot lamang sa P300 kada kilo ang presyo ng frozen liempo, habang nasa P200 kada kilo ang frozen kasim o pigue.
“’Yung per kilo nila ay medyo mababa kumpara talaga sa mga bagong katay, takbuhan kapag wala talaga.”
“Niluluto naman ng maayos, basta maganda ang pagkaluto ay okay naman,” wika ni Fe Corpuz, mamimili.
Pero, may pagkakaiba ang itsura ng frozen na karneng baboy at lokal na karne.
Mapapansin na maputla at matigas ang frozen na baboy dahil sa prosesong pagyeyelo, samantalang mas namumula at malambot ang lokal na karne dahil ibinebenta ito agad matapos katayin.
Sabi ng ilang tindera, ligtas naman anila kainin ang frozen pork basta’t maayos itong naihanda’t nailuto.
“Ligtas naman po kasi sa malalaking restaurants ‘yan na rin ang gamit. Wala pa naman akong nabalitaang nagrereklamo,” ani Aurora Macapagal, tindera ng frozen/imported na karneng baboy.
Sa kabila ng mga paliwanag, desidido na ang DA na magpatupad ng maximum suggested retail price o MSRP sa imported na karneng baboy, bagay na ikinabahala ng ilang nagtitinda.
“Siguro, balansehin muna kasi paiba-iba ‘yung capital eh. Katulad, kapag kumuha ako sa iba ang mura, sa iba ang mahal. Kasi, parang may patong, icha-charge na naman, di ba,” saad ni Ellaine Arellano, tindera ng frozen/imported na karneng baboy.
Paliwanag naman ng DA, ang MSRP ay hakbang upang maiwasan ang pananamantala sa merkado.
“Kaya gusto natin i-set ‘yung MSRP sa pork kasi baka naman mayroong mag-take advantage sa ibang market na imbes na ibenta ang imported pork na P300 ang liempo tapos gagawin niya kunwari lokal tapos ibenta niya ng P450 o P400,” ayon kay Sec. Francisco Tiu Laurel Jr., Department of Agriculture.
