PINATAWAN ng Office of the Ombudsman ang ilang opisyal ng Department of Agriculture (DA) at Food Terminal Incorporated (FTI) ng anim na buwang preventive suspension.
Kasunod ito sa kwestiyunableng pagbili ng sibuyas sa Bonena Multipurpose Cooperative.
Sa inilabas na desisyon ng Ombudsman, kabilang sa mga sinuspinde sina DA Consumer Affairs Assistant Secretary Kristine Evangelista, DA Administrative Officer V Eunice Biblanias, DA OIC-Chief Accountant Lolota A. Jamela, FTI Vice President for Operations John Gabriel Benedict C. Trinidad III at at FTI Budget Division Head Juanita Lualhati.
Batay sa suspension order ni Ombudsman Samuel Martires, malakas ang ebidensiya laban sa mga naturang opisyal sa grave misconduct at gross neglect of duty.
Ito ay dahil sa paglabag sa Procurement Law sa kawalan ng parameters sa pagpili ng magsusuplay na kooperatiba sa Kadiwa Food Hub Project, pagbibigay ng advance payment na 50% sa Bonena Coop.
Kasama rin ang kwestiyunableng delivery ng mga sibuyas ng naturang kooperatiba.
Matatandaang, sumipa ang presyo ng sibuyas noong nakaraang taon na umabot sa P700 kada kilo dahil sa umano’y shortage.
