GUMULONG na sa Senado ang pagdinig sa pag-regulate ng flavored vape sa pangunguna ni Senator Pia Cayetano, chairperson ng Senate Committee on Sustainable Development Goals, Innovation and Futures Thinking, araw ng Biyernes.
Ito ay umarangkada kasunod ng kanyang privilege speech kamakailan kaugnay sa nakakaalarmang paglaganap ng mga nakakaengganyo sa mga kabataan na flavored vape.
“The sale of vaporized nicotine and non-nicotine products and novel tobacco products that are packaged, labeled, presented, or marketed with flavor descriptors that are proven to unduly appeal particularly to minors shall be prohibited. A flavor descriptor is presumed to unduly appeal to minors if it includes a reference to a fruit, candy brand, dessert, or cartoon character,” ani Sen. Pia Cayetano, Chairperson, Senate Committee on Sustainable Development Goals, Innovation and Futures Thinking.
Ayon sa batas o RA 11900 o Vape Law, ang pagbebenta ng flavored vape na nakakaengganyo sa mga kabataan ay mahigpit na ipinagbabawal.
Ngunit ipinagtataka sa Senado kung bakit mabagal kumilos dito ang Department of Trade and Industry (DTI).
Ang DTI kasi ang pangunahing ahensya na dapat nakatutok sa pag-regulate ng flavored vape na malayang nabibili ngayon online.
Sa panig ng DTI, sinabi ni Assistant Secretary Ann Claire Cabochan na nagpadala na sila ng show cause order sa mga online selling companies para magpaliwanag.
Pero para kay Sen. Pia hindi tama dahil sa may kapangyarihan naman ang ahensya na kumpiskahin ang ipinagbabawal na produkto.
Sa huli ay inamin ng DTI na alam nila na may kapangyarihan silang i-confiscate ang mga flavored vape ngunit lumutang sa pagdinig na hindi ito agad naipapatupad dahil sa isang department order.
