APRUBADO na ng Metro Manila Mayors ang pagpapatupad ng Metro Manila Traffic Code matapos ang pagpupulong ng local chief executives, Martes ng umaga sa MMDA office sa Pasig.
Sa ilalim nito, ipatutupad na sa 17 LGUs sa Kalakhang Maynila ang single ticketing system at ang pag-iisa sa traffic violations at penalties sa buong rehiyon.
Ang MMDA naman ang gagastos sa hardware sa pagpapatupad ng programa sa buong Metro Manila.
May 45 araw o hanggang March 15 ang bawat LGU na amyendahan ang kani-kanilang local traffic ordinance para i-adopt ang Metro Manila Traffic Code.
Inaprubahan naman ang bagong programa sa naganap na Metro Manila Council Meeting na dinaluhan ng Meto Manila Mayors.
Personally present sa meeting sina San Juan City Mayor Francis Zamora, Muntinlupa Mayor Ruffy Biazon, Marikina Mayor Marcy Teodoro, Quezon City Mayor Joy Belmonte, Valenzuela City Mayor Wes Gatchalian at Malabon City Mayor Jeannie Sandoval.
Ayon kay MMDA Chairman Romando Artes, inabot 28 taon bago mapagkaisa at makabuo ng unified traffic and penalty policy sa Metro Manila.
