Abril 28, 2025—Nagpahayag ng taos-pusong pakikiramay at nanawagan ng hustisya ang ilang senador ng Pilipinas kaugnay ng malagim na insidente sa Vancouver, Canada, kung saan isang SUV ang sumalpok sa mga dumalo sa isang Filipino street festival, na nagresulta sa pagkamatay ng labing-isa at pagkasugat ng mahigit dalawampung katao.
Ayon kay Senador Win Gatchalian, lubos ang kanyang pakikiramay sa mga pamilya ng mga biktima at hinikayat ang mabilis na imbestigasyon upang mapanagot ang salarin.
“Ang ganitong uri ng karahasan ay walang puwang saan mang panig ng mundo. Kaagapay ako sa paghingi ng hustisya,” aniya.
Kinondena rin ni Senadora Grace Poe ang insidente at hiniling na mabigyang-tulong agad ang lahat ng naapektuhan.
“Kailangang agad na imbestigahan ang nangyari. Hindi lang ito tungkol sa pananagutan kundi pati na rin sa kalinga sa mga biktima,” pahayag ni Poe.
Sa isang pahayag, sinabi ni Senate President Chiz Escudero na hindi dapat hinahayaan ang ganitong karahasan na umiral saanmang panig ng mundo.
“Hindi pinalalabnaw ng karagatan ang sakit ng isang trahedya,” saad niya. “Kailangan natin ng katarungan, hindi lang para sa mga nasawi kundi para sa buong komunidad.”
Nanawagan si Senador Joel Villanueva sa Department of Foreign Affairs (DFA) at sa Department of Migrant Workers (DMW) na magbigay ng buong suporta sa mga Pilipinong naapektuhan.
“Hindi natin sila dapat pabayaan. Kailangang siguraduhing mananagot ang may sala at may sapat na tulong ang ating mga kababayan doon,” pahayag niya.
Kumpirmado ng mga awtoridad sa Canada na naaresto na ang suspek at nagpapatuloy na ang masusing imbestigasyon upang matukoy ang motibo at kung may kaugnayan ito sa alinmang extremist activity.
Tiniyak naman ng mga opisyal na nakatutok sila sa pagbibigay ng tulong at psychological support sa mga pamilya ng biktima, kabilang na ang mga Pilipino.
Follow SMNI News on Rumble
