NAGLABAS ang Department of Budget and Management (DBM) ng P3.41-B para pondohan ang pag-aaral ng mga mag-aaral sa technical vocational institutions.
Inaprubahan ni DBM Secretary Mina Pangandaman ang pagpapalabas ng Special Allotment Release Order (SARO) sa Department of Labor and Employment-Technical Education and Skills Development Authority (DOLE-TESDA).
Gagamitin ito para sa implementasyon ng Universal Access to Quality Tertiary Education (UAQTE) Act.
Ayon kay Pangandaman, higit pa sa isang pribilehiyo ang edukasyon, aniya, ito ay isang basic human right.
Ibinahagi ng kalihim na humigit-kumulang 74,262 mag-aaral sa ilalim ng Universal Access to Quality Tertiary Education program para sa School Year 2024 ang makikinabang sa inilaan na P3.41-B na pondo.
Ito ay sumasaklaw sa tuition at miscellaneous fees, accident insurance, trainee provision, internet allowance, starter tool kit, national assessment fees, at iba pang bayarin sa paaralan.
Inaprubahan ng DBM chief ang pagpapalabas ng pondo noong Enero 26, 2024 na magmumula sa regular budget ng DOLE-TESDA sa ilalim ng Fiscal Year 2024 General Appropriations Act (GAA).
