MULING pinagtibay ng Armed Forces of the Philippines (AFP) at Philippine Commission on Women (PCW) ang kanilang pagtutulungan sa gender and development (GAD) matters sa militar.
Pinangunahan nina AFP acting Vice Chief of Staff Lieutenant General William Gonzales at PCW Executive Director Attorney Kristine Rosary Yuzon-Chavez ang paglagda sa partnership agreement na ginanap sa AFP General Headquarters sa Camp Aguinaldo, Quezon City.
Ito ay kasabay ng GAD Executive Briefing na dinaluhan ng AFP personnel at mga miyembro ng Major Services GAD Focal Point System Executive Committee.
Sa ilalim ng kasunduan na unang nilagdaan noong Setyembre 2021, magtutulungan ang AFP at PCW sa pagbuo ng GAD Agenda, Analysis at Analysis Tools Training ng AFP.
Magbibigay rin ang PCW ng technical inputs sa GAD-related policies at pangangasiwaan ang pag-update ng GAD Mainstreaming Evaluation Framework Scores, bukod sa iba pang mga inisyatiba sa ilalim ng Magna Carta for Women.
